FÄÄNWIH from FÄÄNWIH by de familich

Fäänwih

Text und Musik : WOLFGANG ANTON

Mich hat et letz et Fäänwih
esu richtich hadd jepack.
Ich daach, wenn do nit fottküss,
haus de alles en d‘r Sack.
ich wor ald fass zor Dür erus,
do reef ne Kumpel an,
dem saht ich, dat ich fott will
ich füng jet Neues an.

Hä frogte noch: „Jung, wat häs Do för?“
Ich saht: „Et kütt drop an,
ens sinn, wat sich do anbeed,
ben mer för jarnix schad.
Mi Leevje es jejange,
ich breche aff mi Zelt,
mich hält he nix mih fess,
ich treck nohm Ihrefeld.“

En hält he nix mih fess,
hä trick nohm Irefeld.

“Dat kannste doch nit maache, Jung,
do küsste nit zoräch.
Ihrefeld heiß Räuberfeld,
de Minsche do sin schlääch.
Do jeihs do wie en Primel en
un wees am Engk bestuss,
bliev besser he em Veedel,
he bes Do doch zo Huus.“

Ich wor nit janz zor Dür erus,
do trof ich ald et Liss,
wat alles schon erfahre hatt:
„Wat mähs do för nen Driss!
Wat wills Do en dem Luffkurort,
wo jar kein Baustell es!
Do jehürs he en et Veedel erin,
he, wo ding Heimat es!“

Op eimol wor et Lisbett
och nit mih allein.
Dä janze Haufe schäle Köpp
all öm mich eröm,
jede woss et besser,
soche mich alt dut em Jrav.
Dann driess ich halt op Ihrefeld
un hau noh Nippes aff.
Dann driess hä halt op Ihrefeld
un häut noh Nippes aff.

Dat kannste doch nit maache, Jung,
do küsste nit zoräch.
Nippes es e Kradeloch,
de Minsche do sin schlääch.

Vielleich 2 , 3 , 4 Bierche
kunnt ich noch standhaff sin,
dann kom en Rund met Klore,
drop stemmte mer all en:
Un op singem ahle Plaatz
bliev hä och jot en Schoss.
Bliev besser he em Veedel,
denn he bes do doch zo Huus.

Do wor mer zo vill Weihrauch drin,
jetz hat de Nas ich voll.
Wenn Nippes voll vun Krade es,
dann trecke ich noh Poll.
Do es et och am Rhing su schön,
do litt mer op d’r Wies
un die Usseech, die mer hät,
doch ech de schönste es.

Dat kannste doch nit maache, Jung,
do küsste nit zoräch.
En Poll wonnt doch nur Buurepack,
de Minsche do sin schlääch.

Jetz wor ich mem Lating am Engk,
woss nit mih us, noch en.
Kein Veedel künnt för mich em Äänz
en neue Heimat sin.
Dann luhrt ich ming Bajasch mer an
un kom dann zo dem Schluss:
Do, wo all ding Fründe sin,
do bes do och zo Huus.

En Nippes, Poll un Ihrefeld,
do setzen och all Lück,
die aff un zo et Fäänwih
em Hätze richtich dröck.
Dröm loss et dir jesaht sin,
weil et su eifach es:
Wann Dich jet dröck, dann drieh dich öm,
domet et nur noch trick.
Wann dich jet dröck, dann drieh dich öm,
domet et nur noch trick.

Dat kanns de doch nit maache, Jung,
do küsste nit zoräch.
Nippes , Poll un Ihrefeld,
ov Sölz un Kletteberg,
ov Müllem udder Ossendorf,
do wees am Engk bestuss.
Bliev en dingem Veedel,
do bes do doch zo Huus.

• Acoustic
• cologne
• folk
• kölsch
• rock
• world-music
• Cologne